O Decamerón —homenaxe á tradición oral e á maxia da arte de narrar; equivalente occidental de As mil e unha noites— constituíuse no libro europeo máis difundido despois da Biblia.

Azoutada pola peste negra, a Florencia do século XIV é o marco no que sete mulleres e tres homes se reúnen para exaltar os deleites da vida e facerlle fronte ao triunfo da morte. Retirados no campo, nos xardíns dun castelo abandonado, este grupo entregarase á narración de historias sensuais e pícaras, xa que «nunha boa historia obteñen tanto pracer quen a narra como quen a escoita». As voces e personaxes femininos prevalecen nesta obra, sobre a cal o propio Boccaccio sostivo: «Quen ousará negar que isto se avén máis ás belas mulleres que aos homes? […] Ás mulleres que aman, propóñome contar cen historias […]. Aqueles e aquelas que as lean teñen a libre elección: escollan as que lles acomoden e deixen ao carón todas as demais […]. Se atopades algún pracer na lectura destes contos, o autor invoca a vosa indulxencia».

Erotismo, chanzas, sensualidade, enganos, embustes e demais pecados e picardías da sociedade humana son despregados nestas fábulas que recollen a profunda influencia que o clasicismo e Dante exerceron sobre o seu autor.

1º-2º BAC

Adultos/as