Hüseyin Yilmaz morre dun infarto o día que cumpre o seu soño de regresar a Istambul para xubilarse. Pasaron trinta anos desde que este home de orixe kurda emigrase a Alemaña, na década de 1970, para traballar de forma incansable e sacar adiante a súa familia, que agora viaxa a Turquía para enterralo. Cada un deles carga cos seus propios demos e o seu particular relato: Emine, a esposa, vive atafegada por dolorosos recordos e segredos do pasado; Sevda, a filla maior, alcanzou o éxito profesional, pero a súa vida persoal derrúbase; o seu irmán, Hakan, escóndese tras unha máscara e cústalle afrontar a súa personalidade; Peri, aínda na universidade, arrastra os seus propios dós, e Ümit, aos seus quince anos, non pode expresar libremente o seu amor por outro mozo. As verdades ocultadas e as feridas do pasado irromperán no presente desta familia e farán cambalear os seus fracturados cimentos.

Nesta premiada novela —que foi tamén finalista do Deutscher Buchpreis, o premio literario máis importante das letras alemás—, e cunha gran dose de potencia narrativa, Fatma Aydemir cuestiona a esencia desta familia de inmigrantes de primeira e segunda xeración, e móstranos os abismos entre uns pais, uns fillos e uns irmáns que só anhelan sentirse comprendidos.

Adultos/as